සෙල්ෆි රැල්ල.........

සෙල්ෆි කියන්නේ ඡායාරූප ගන්නා තැනැත්තා පෙනී සිටින ආලේඛ්‍ය ඡායාරූපයටයි. එය ගනු ලබන්නේ සාමාන්‍ය ඩිජිටල් කැමරාවකින් නැතහොත් කැමරාෆෝන් එකකිනි.සෙල්ෆි වඩාත් ජනප්‍රිය වීමට කැමරාෆෝන් සහ ෆේස්බුක් වැනි සමාජජාලා හේතු විය.දිනකට සෙල්ෆි මිලියන ගණනාවක් ගන්නා බව සදහන් වේ. 

වර්තමානය වන විට දේශපාලකයින්, ලෝක නායකයින් ,මිතුරු මිතුරියන් අතර වයස් ජාති භේදයකින් තොරව මෙම සෙල්ෆි රැල්ල ව්‍යාප්තව පවතී.නළු නිළියන් එකතුවන තැන්වල , ලෝක නායකයින් එකතුවන තැන්වල ,විශේෂ උත්සව අවස්ථාවල සෙල්ෆි ගැනීම අද ජනප්‍රිය වී තිබේ.

සෙල්ෆි නැමති වචනය ඔක්ස්ෆර්ඩ් ශබ්දකෝෂයට එකතු වූයේ 2013 දීය.නමුත් අදවන විට එය එදිනෙදා භාවිත ශබ්දකෝෂයේ නිතර හුවමාරු වන වචනයකි.ඔක්ස්ෆර්ඩ් ශබ්දකෝෂයේ සෙල්ෆි යන්න අරුත් ගන්වා ඇත්තේ අතේ දුරින් කැමරාවක් හෝ ස්මාට් ෆෝන එකක් තබාගෙන තමන්ගේ මුහුණේ ඡායාරූපයක් ගැනීමයි. සෙල්ෆි ලෝකය තුළ මෑතකදී ජනප්‍රිය වුවත් මුල්ම සෙල්ෆිය ගෙන තිබෙන්නේ 1839 දී රොබට් කෝර්නේලීස් නමැති ඡායාරූප ශිල්පියායි.

වර්තමානය වන විට සෙල්ෆි වර්ග ගණනාවක් හදුනා ගත හැකිය.ඒ අතර ෆින්ටන් ජන්කි නමැති ව්‍යායාම කිරීමෙන් සාදාගන්නා ඇග පෙන්වීමට ගනු ලබන සෙල්ෆි වර්ගයකි. මීට අමතරව ඇඹුල් සෙල්ෆි, වැකේෂන් සෙල්ෆි, යාළු මාළුවෝ සෙල්ෆි, බබාලගේ හුරතල් සෙල්ෆි, කම්මැලි සෙල්ෆි, තරු සෙල්ෆි ආදී ගණනාවත් වේ. මෑත කාලයේදී ලංකාවේ ජනප්‍රිය සෙල්ෆියක් බවට පොලීසිය තරුණයන් දෙදෙනෙකුට දඩ ගසන අවස්ථාවක ගන්නා ලද ඡායාරූපය දැක්විය හැකිය.

ලෝකයේ ජනප්‍රියම සෙල්ෆිය බවට පත්ව තිබෙන්නේ 2014 ඔස්කාර් සම්මාන උළෙලේදී ප්‍රසිද්ධ නළු නිළියන් රැසක් එකට එක්ව සිට ගන්නා ලද ඡායාරූපයකි.

සෙල්ෆි මගින් මුල්කාලයේ ප්‍රසිද්ධිය ලබා ගැනීමට හැකිවුවත් වර්තමානයේ සමාජ මාධ්‍ය අපේ ජීවිතයේ කොටසක් වී ඇති බැවින් සෙල්ෆි අප්ලෝඩ් කරන්නන්ට හොද හා නරකට මුහුණ දීමට සිදුව ඇත. විකෘති මානසික තත්ත්වයක් ඇති අය කාන්තාවන්ගේ සෙල්ෆි ඡායාරූප වැරදි අන්දමට භාවිත කිරීම වාර්තා වී තිබේ. එමෙන්න ඇතැම් පුද්ගලයන් සෙල්ෆි වලට ලැබෙන ප්‍රතිචාර මත තම දිවියේ එක් එක් අංග වෙනස් කර ගැනීම කරයි. ඇග අඩු කර ගැනීමට උත්සහා කිරීම, විවිධ ප්ලාස්ටික් සැත්කම් වලින් රූපය ලස්සන කර ගැනීමට කටයුතු කිරීම, සිය දිවි නසා ගැනීම,මානසික රෝගවලට ලොදුරු වීම දැක ගත හැකිය.

කෙසේ වෙතත් මෙම සෙල්ෆි රැල්ල තුළ අවධානය යොමු කළයුතු කරුණු කීපයකි. සමාජ මාධ්‍ය මගින් අප දකින සුන්දරත්වය ප්‍රසන්න බව හා පොහොසත්බව ව්‍යාජ දේවල් මිස සත්‍ය ලෝකයේ පවතින සැබෑ අරුත් නොවේ.ඕනෑම අයෙකුට ලබා ගත හැකි බැවින් තරුණියන් හා කාන්තාවන් සෙල්ෆි ආදිය සමාජ මාධ්‍ය වලට එකතු කිරීමේදී පරිස්සම් විය යුතුය.